媒体报道


丝丝讲场:医思高层「执靓」做生招牌

家阵做好上市公司掌舵人呢份工,唔单只要求公司盘数靓咁简单,仲要瞓身做埋公司个生招牌先掂。为咗上市,佢哋可以去到几尽?
四位上市公司掌舵人为省靓招牌各出奇谋。
近日经营DR REBORN嘅医思医疗(02138)公开招股,公司创办人兼CEO邓志辉同COO李嘉豪不断曝光。发觉佢哋外形零舍白净?冇错,事关佢哋做咗自家脱毛疗程。
齐齐帮衬自家疗程
寻日公司市场推广部高级经理钟婵佳(Maggie)同丝丝讲开,话唔少男士都会脱须根,仲有去皱纹等,两位高层都做紧脱须根疗程,朝早悭唔少剃须时间执正个Look,不过整个Treatment仲未100%完成。
卡宾主席自制战衣
为咗上市,脱多几条毛发又如何!其实做得上市公司灵魂人物,都预咗被人摆上枱(或索性自己嚟),好似人称「卡宾先生」嘅卡宾(02030)主席杨紫明,次次出场都度身订造自家设计嘅战衣,就系要突出时尚品味兼Eye Catching;专做透明质酸嘅华熙生物科技(00963)主席赵燕甚少公开露面,但都有办你睇,承认用咗自家产品十年,睇番新旧照片对比都未惊过。
瑞年国际(02010)主席兼CEO王福才医院院长出身,每日都食用自家品牌氨基酸片,经常四出路演依然精神奕奕,连佢哋位CFO潘翼鹏都系公司忠实用家,每逢应酬要畅饮,都用自家产品「酒漏斗18」打定底兼全程不离手。See!上市点只盘数咁简单,见识到未。
余丝韵